Góð luttøka á borgarafundi í Nólsoy
Yvir 50 fólk vóru møtt til borgarafund í Royndarhúsinum í Nólsoy fyrrakvøldið, 1. apríl, har kjakast varð um eina Ramsar ætlan Nólsoy
Ætlanin um at gera eina sokallaða Ramsar ætlan fyri Nólsoy varð løgd fram á borgarafundinum. Høvuðssjónarmiðið í ætlanini er, at alt verandi virksemi, so sum veiða, nýtsla og siðir skulu halda fram óbroyttir, so leingi tað ikki gongur út yvir náttúruna, serliga drunnhvítan, og at møgulig tiltøk, sum skulu setast í verk fyri at verja náttúruna, í størstan mun skulu fremjast í semju millum myndugleikar og bygdarfólk, at allir partar skulu vera tiknir við í arbeiðið, og at øll sjónarmið skulu verða hoyrd.
Dúgligt orðaskifti var um ætlanina, og fleiri góð sjónarmið og uppskot komu fram. Fleiri hildu tó, at kunningin til bygdarfólkið ikki hevði verið nóg góð áðrenn fundin, og kendu seg tí ótrygg um Ramsar ætlanin fer at seta forðingar fyri siðvenju og virksemi hjá bygdarfólkinum.
Øll vóru samd um, at bátar, sum sigla við nógvari ferð tætt fram við land um summarið, er ein stórur trupulleiki fyri lundan. Eisini var semja um, at um nógv fólk ganga óskipað í haganum meðan heiðafuglurin reiðrast, styggir tað fuglin. Ein triði spurningur, sum varð umrøddur, var hvussu forðast kann fyri, at rotta kemur í oynna.
Øll hesi sjónarmið verða tikin við í arbeiðið gera eina Ramsar ætlan fyri Nólsoy, sum áðrenn hon verður gjørd liðug, skal leggjast fyri nýggjan borgarafund seinni í ár.
Endamálið við Ramsar sáttmálanum er at tryggja eina skynsama gagnnýtslu av náttúruni, men eisini, um neyðugt, at seta tiltøk í verk fyri at verja náttúruna. Í Ramsar høpi verður serligur dentur lagdur á at verja vatn- og sjófugl.
Drunnhvítastovnurin í Nólsoy er eitt náttúruvirðið í heimsflokki, tí talan er um ikki minni enn heimsins størsta drunnhvítabøli. Náttúrugripasavnið, sum hevur gjørt teljingar av drunnhvíta í Nólsoy, hevur mett, at umleið 50 túsund pør av drunnhvíta eiga í Nólsoy. Harumframt eru umleið 30 túsund pør av lunda, sum eisini er ein týdningarmikil partur av heimsstovninum, í Nólsoy.
Vil tú vita nærri ber til at venda sær til Mariu Gunnleivsdóttir Hansen á tlf. 342400 ella senda ein t-post á us@us.fo
