140x140

Umhvørvisstovan samskipar norðurlendskan arbeiðsbólk

06-03-2018 | Dálking og vernd

Myndafólk: Søren Sigfusson/norden.org

Talan er um arbeiðsbólkin um vistskipanir á landi (Terrestriske økosystemgruppen, TEG) í umhvørvissamstarvinum undir Norðurlendska ráðharraráðnum, ið hevur sum høvuðsendamál, at fyribyrgja afturgongd í lívfrøðiliga margfeldinum í norðurlondum. Bólkurin arbeiðir eisini við náttúruvernd, útilívi og landslag- og mentanarumhvørvi.

Í løtuni verða serliga verkætlanir, sum snúgva um, árin av útilívi og náttúruferðavinnu á lívfrøðiliga margfeldið, raðfestar.

Samskiparauppgávan er við til at geva okkum íblástur til arbeiðið at verja náttúrumargfeldið, at fjølga um vitan okkara á økinum, geva innlit í royndir onnur norðurlond hava ognað sær umframt at skapa okkum eitt størri netverk.

Limirnir í arbeiðsbólkinum eru úr náttúru-, umhvørvis- og fornminnafyrisitingunum í øllum norðurlondum. Umboð fyri Føroyar er Maria Gunnleivsdóttir Hansen, lívfrøðingur, ið starvast sum málsviðgeri á Umhvørvisstovuni. 

TEG er ein av átta arbeiðsbólkum í umhvørvissamstarvinum undir Norðurlendska ráðharraráðnum. Samskiparauppgávan er vanliga hjá einum av náttúru-,  umhvørvis- ella fornminnamyndugleikunum í norðurlondum, og verður fíggjað av Norðurlandaráðnum. Til ber at lesa meira um virksemið hjá TEG og hinum arbeiðsbólkunum á heimasíðuni hjá Norðurlandaráðnum her.

Tað er Sigga Jacobsen, ið røkjur samskiparauppgávuna. Sigga hevur master prógv í altjóðaviðurskiftum og drúgvar royndir innan almenna fyrisiting.

 

Um tú hevur spurningar ella viðmerkingar er tú vælkomin at venda tær til Siggu Jacobsen, telefon 342400, ella at senda okkum ein teldupost us@us.fo

« Aftur